MTV Music Awards ka mbledhur një numër të madh të artistëve në mesin e të cilëve ishte edhe këngëtarja me famë ndërkombëtare Bebe Rexha e cila për këtë event kishte zgjedhur që të vishet nga disenjatorja kosovare, Fjolla Nila.
E veshur me një kostum trupi blu mbretërore, kadife, Rexha ka kaluar tapetin e kuq në kupolën e PSD Bank Dome të dielën e 13 nëntorit në Dusseldorf të Gjermanisë.
33-vjeçarja ka performuar hitin e saj më të fundit, “I’m good (Blue)” në bashkëpunim me DJ-in e famshëm, David Guetta.
Dyshja po ashtu kanë qenë të nominuar për çmimin “Bashkëpunimi më i mirë” në këtë mbrëmje çmimesh.
Ndërkaq bashkëpunëtori i saj David Guetta kishte zgjedhur të vishte një kostum të zi tradicional.