Republika Çeke, që kryeson Këshillin e Bashkimit Evropian, ka bërë thirrje që të krijohet një gjykatë ndërkombëtare, në të cilën do të gjykoheshin krimet ruse mbi Ukrainë.
Arsyeja e kësaj iniciative të Çekisë është zbulimi i qindrave trupave të ukrainasve që u vranë në qytetit Izyum nga trupat ruse, shkruan BBC.
“Ne qëndrojmë për ndëshkimin e të gjithë kriminelëve të luftës”, ka thënë ministri i jashtëm çek, Jan Lipavsky, teksa shtoi se “bëj thirrje për ngritjen e shpejtë të një gjykate të posaçme ndërkombëtare që do të ndjekë penalisht krimin e agresionit.”
“Në shekullin e 21-të, sulme të tilla ndaj popullatës civile janë të paimagjinueshme dhe të neveritshme”, ka shtuar Lipavsky.
Pas çlirimit të qytetit, u zbulua një varrezë masive, ku rreth 450 civilë, në mesin e tyre kryesisht gra e fëmijë, u vranë nga rusët.
Ndërkaq, presidenti ukrainas, Volodymyr Zelensky,ka thënë se hetuesit kanë zbuluar prova të reja të torturës së përdorur kundër njerëzve të varrosur në Izyum, në rajonin e Kharkiv.
“Më shumë se 10 dhoma torture janë gjetur tashmë në zonat e çliruara të rajonit të Kharkiv, në qytete dhe qyteza të ndryshme”, ka thënë Zelensky.
Ai shtoi se rusët do të duhet të përgjigjen “si në fushën e betejës ashtu edhe në sallat e gjyqit”.
Të enjten, kryetarja e Komisionit të BE-së, Ursula von der Leyen tha se dëshironte që Putin të përballej me Gjykatën Penale Ndërkombëtare për krimet e luftës në Ukrainë.
Zbulimi i vendeve të varrimit erdhi ndërsa trupat ukrainas vazhduan kundër-ofensivës në verilindje të vendit, pasi rimorën me sukses territorin nga Rusia ditët e fundit.