“DokuFest është ngjarja më e madhe kulturore ndërkombëtare në Kosovë”, kështu e përshkruan kryeministri i Kosovës festivalin DokuFest.
Kryeministri Kurti ka shkruar se festivali DokuFest është institucion i rëndësishëm i krijimtarisë dhe i edukimit artistik.
“Ndonëse ka hyrë në dekadën e tretë të ekzistencës, festivali asnjëherë nuk e humbi magjinë e vet. Përkundrazi, edhe ky edicion që nisi mbrëmë, premton një javë plot shkëlqim mbi gurët e monumenteve të Prizrenit”, shkruan kryeministri i Kosovës, Albin Kurti në Facebook.
Sipas kryeminisrit të Kosovës, festivali DokuFest është mënyra më efektive për t’ia rrëfyer botës krijimtarinë dhe potencialin tonë artistik, zellin e talentin rinor. Ai është edhe ekonomi për qytetin, vullnetarizëm për rininë, rrjetëzim për artistin, dhe kulturë për turistin.
“Si adhurues i kinemasë dhe i qytetit të Prizrenit, natyrshëm kam qenë pjesëmarrës i rregullt i edicioneve të festivalit. Tash me përgjegjësi shtesë, në krye të Qeverisë që po e realizon reformën më të madhe kulturore ndonjëherë në vend, që DokuFest dhe pjesa tjetër e skenës së pavarur kulturore të gëzojnë mbështetje të rritur dhe partneritet strategjik për nevojat zhvillimore dhe diplomatike të shtetit tonë”.
Kurti shton se edicioni i 21-të është mundësi e mirë dhe arsye e fuqishme për të shprehur mirënjohjen tonë të thellë për ata që patën guxim në fillim. Dhe pastaj edhe vizion, durim e përkushtim.