Ministri i Bujqësisë, Pylltarisë dhe Zhvillimit Rural, Faton Peci, ka nënshkruar të enjten Udhëzimin Administrativ për trajtimin e qenve endacakë në territorin e Republikës së Kosovës.
Kështu ka njoftuar kryeministri i Kosovës, Albin Kurti, i cili ka thënë se ky hap i rëndësishëm vendos themelin e bazës ligjore për trajtimin e qenve endacakë në vend.
Udhëzimi Administrativ, i cili u deklarua nga Kurti, përcakton qartazi kushtet dhe kërkesat teknike që duhet të plotësohen për trajtimin e qenve dhe macave. Në veçanti, përcaktohen ambientet e ndara për secilën fazë të trajtimit, duke siguruar një nivel të lartë të higjienës.
Udhëzimi gjithashtu rregullon veprimet dhe sjelljet ndaj qenve endacakë, duke filluar nga momenti i kapjes së tyre, izolimi, trajtimi, kastrimi, sterilizimi, deri në fazën e pasoperacionit, socializimit, adoptimit dhe lëshimit në vendin e duhur.
Ky hap i ri ligjor ka për qëllim të mbrojë mirëqenien dhe të drejtat e qenve endacakë në tërë territorin e Kosovës.