Kryeministri i Kosovës, Albin Kurti, me rastin e Festës së Flamurit, ka thënë se 28 Nëntori është pikënisja dhe pikëprerja e kombit shqiptar.
Me anë të një postimi në Facebook, kreu i qeverisë ka theksuar se në Vlorë, në 110-vjetorin e Shpalljes së Pavarësisë së Shqipërisë, kujtuan historinë, përkujtuan sakrificën dhe nderuan lavdinë e atyre që besuan sepse ëndërruan, punuan sepse besuan.
“Çdo vit, 28 Nëntori na bën bashkë. 28 Nëntori është pikënisja dhe pikëprerja e kombit tonë. E ne duhet të jemi më shpesh bashkë. Të punojmë bashkë. Të rrugëtojmë bashkë. Sepse duam. Sepse duhet”, ka shkruar Kurti.
Ndërkaq të dielën e 27 nëntorit, ndërkohë që në Tiranë po mbahej mbledhja e parë të përbashkët të Kuvendeve të Kosovës dhe Shqipërisë, në Prishtinë, shënohej Dita e Forcës.
Sipas Kurtit, për Qeverinë ky ishte viti i ushtrisë.
“Me një ndarje buxhetore prej 123 milionë euro, që tejkalon çdo vit paraprak; e me 99% më tepër investime në blerje ushtarake përgjatë këtij viti, ushtria jonë po konsolidohet në aspektin profesional e operacional”, shtoi ai.
Kreu i ekzekutivit ka thënë se përkrah aleatëve po kontribuojnë në mbrojtjen e vlerave universale të lirisë, paqes dhe demokracisë.
Sipas tij, Forca e Sigurisë së Kosovës është forca e pashtershme e brezave të tërë të popullit luftëtar, të vendosur e të pathyeshëm.
“Urime të gjithëve 28 Nëntori, Dita e Flamurit! Le t’i gëzohemi sukseseve të secilit shqiptar. Le t’i bëhemi krah secilit shqiptar”, përfundoi ai.