Në ditën e Evropës, 9 majin, kryeministri i Kosovës, Albin Kurti, ka mirëpritur ministrin e Punëve të Jashtme të Kroacisë, Gordan Grliq Radman.
Në këtë takim, shefi i ekzekutivit me ministrin Radman ka diskutuar edhe për dialogun Kosovë – Serbi.
Kreu i Qeverisë së Kosovës i ka thënë ministrit kroat se në takimin në Bruksel më 2 maj, kishte propozuar që çështja e pakicës kombëtare serbe të trajtohet sipas modelit kroat.
“Në takim u diskutua edhe për procesin e dialogut të ndërmjetësuar nga Bashkimi Evropian dhe për Marrëveshjen Bazike ndërmjet Kosovës dhe Serbisë dhe Planin e Zbatimit të saj, sipas dakordimit në Bruksel dhe në Ohër. Kryeministri e njoftoi ministrin Radman se në takimin e fundit të nivelit të lartë, që u mbajt javën e kaluar, ka paraqitur vizionin e tij për zbatimin e nenit 7 të Marrëveshjes Bazike, bazuar në modelin kroat të trajtimit të pakicave kombëtare serbe. Në lidhje me të, ai tha duke qenë vend anëtar i BE-së dhe i NATO-s, Kosova e sheh Kroacinë si tregim suksesi dhe model që duhet ndjekur për sa i takon të arriturave ekonomike dhe demokratike, por edhe për sa i përket respektimit të të drejtave të minoriteteve”, thuhet në njoftimin e Zyrës së Kryeministrit.
Tutje, Kurti e falënderoi Radman për kontributin, ndihmën dhe mbështetjen e pareshtur të Kroacisë që nga koha e Federatës së ish- Jugosllavisë, pas luftës çlirimtare e deri te shpallja e pavarësisë.
“Kroacia ishte një nga shtetet e para që njohu pavarësinë e Kosovës, teksa muajin tjetër shënojmë 15-vjetorin e vendosjes së marrëdhënieve diplomatike. Kryeministri Kurti e njoftoi ministrin Radman me zhvillimet aktuale, punën e qeverisë dhe arritjet kryesore të viteve të fundit. Progres ky që po mbështetet edhe nga raportet kredible ndërkombëtare, të cilat vit pas viti po e nxjerrin Kosovën si lidere në mesin e gjashtë shteteve të Ballkanit Perëndimor, sidomos në fushën e demokracisë, lirive dhe të drejtave, sundimit të ligjit dhe luftimit të korrupsionit”, thuhet tutje.
Ndërkaq, ministri Radman ka thënë se vendi i tij përkrah Kosovën në anëtarësimin e saj në organizata ndërkombëtare, përfshirë këtu kandidimin e Kosovës në Bashkimin Evropian.