Me rastin e Ditës së Dëshmorëve, kryeministri i Kosovës, Albin Kurti, ka bërë homazhe te varrezat e dëshmorëve në lagjen Velania në Prishtinë si dhe te shtatorja e heroit, Zahir Pajaziti.
Pas homazheve, Kurti para mediave ka thënë se, e kaluara e lavidshme e dëshmorëve është vendimtare për ecjen përpara të Kosovës si shtet.
“Kujtimi dhe përkujtimi ynë për ta është dëshmi që ne besojmë për të tashmen tonë, për të ardhmen tonë, e kaluara e lavdishme është vendimtare për drejtimin dhe shpejtësinë në ecjen përpara të Kosovës si shtet dhe shqiptarëve si komb”, është shprehur Kurti.
I pari i ekzekutivit, ka theksuar se si qeveri duke iu falënderuar gjakut të dëshmorëve nuk do të harrojnë se nga vijnë.
“Si Qeveri e Kosovës asnjëherë nuk do të harrojmë se nga vijmë dhe ku duhet të shkojmë, pikërisht, duke iu falënderuar gjakut të derdhur për liri, i cili nuk shlyhet kurrë ashtu sikurse edhe emri i këtyre dëshmorëve nuk do të harrohet kurrë”, ka shtuar ai.
Ai pas homazheve te shtatorja e Zahir Pajazitit, ka thënë se, komandanti Pajaziti është hero i popullit në ditët e sotme, por do të mbetet për jetë e mot udhërrëfyes për çdo qeveri dhe për të gjitha institucionet e shtetit.
“Prishtina si kryeqytet është gjatë luftës çlirimtare vendi në kuadër të zonës operative të Llapit e ku kishin komandant Zahir Pajazitin, i cili me aksionet e tij çlirimtare e dha kushtrimin e lirisë shumë herët, para se të fillonte lufta çlirimtare, dhe në këtë mënyrë mobilizoi mbarë popullin dhe zgjeroi radhët e Ushtrisë Çlirimtare të Kosovës drejt qershorit të vitit 1999 edhe kur u realizua çlirimi i vendit”, është shprehur Kurti.
Kurti pa harruar edhe dëshmorët, Hakif Zejnullahun dhe Edmond Hoxhën, ka thënë se, ata ishin luftëtarë të paepur që nuk kursyen asgjë.
“Goditnin forcat armike pushtuese serbe gjithandej Kosovës e në veçanti kontribuuan shumë që UÇK të marrë hovin dhe të shndërrohet në ushtri të vërtetë e cila u bë bartëse e çlirimit të vendit tonë bashkë edhe me ndërhyrjen e NATO-s kundër forcave policore ushtarake dhe paramilitare të Jugosllavisë dhe Millosheviqit”, shtoi Kurti.
Sipas Kurtit, atyre që kontribuuan dhe sakrifikuan, shteti i Kosovës u ka borxh që të ardhmen ta bëjë shumë më të mirë e më të ndritshme sesa që ëhstë tani e ishte në të kalurën.
“Ne që e mabjmë mend dhe e kemi jetuar atë kohë, por edhe ata që rriten sot, të gjithë duhet mirë ta dijnë se nga vijmë në mënyrë që të jemi të sigurt për rrugën tonë përpara si në aspektin e shtetndërtimit demokratik, të mobilizimit të aktivizimit qytetarë gjithashtu edhe të zhvillimit socio-ekonomik”, tha Kurti.
Gjatë homazheve, Kurti ishte i shoqëruar me ministrin e Punëve të Brendshme, Xhelal Sveçla, ministrin e Mbrojtjes, Armend Mehaj dhe bashkëpartiakët e tij.