Kryeministri i Kosovës, Albin Kurti, është takuar me të dërguarin e Bashkimit Evropian për dialogun Kosovë – Serbi, Miroslav Lajçak në margjinat e Forumit Ekonomik në Delphi.
Me emisarin e BE-së, Kurti ka diskutuar për pritjet nga takimi i 2 majit në Bruksel dhe për zgjedhjet që janë mbajtur të dielën e 23 prillit në veri.
“Diskutuam për takimin e radhës në Bruksel dhe për zgjedhjet e fundit lokale në katër komunat tona në veri me Miroslav Lajçakun në Forumin Delphi”, tha Kurti në Twitter.
Tutje Kurti ka theksuar se marrëveshja bazë “duhet të zbatohet krejtësisht dhe me shpejtësi”.
“Pa parakushte e pa vonesa”, ka thënë ndër të tjera kreu i qeverisë.
Gjatë ditës, Kurti në margjina të këtij forumi është takuar edhe me emisarin britanik, Stuart Peach me të cilin diskutuan për marrëdhëniet dypalëshe ndërmjet Kosovës dhe Mbretërisë së Bashkuar dhe për zhvillimet e aktuale në Kosovë dhe rajon.