Tenori me famë ndërkombëtare, Ramë Lahaj, përmes një postimi në Facebook, ka reaguar në lidhje me rastin e ndodhur të mërkurën e 2 nëntorit, në Shtëpinë e pleqve në Pejë, ai ka thënë që ky rast është një shembull se rinia po del jashtë kontrollit.
“Njerëz të mirë, Aurona është një shembull se sa shumë rinia po na del jashtë kontrollit, si pasojë e humbjes së respektit në familje, ndaj prindërve, gjyshërve, anashkalimi i edukatës në shtëpi, humbja e traditës se shenjët shqiptare, e respektit ndaj më të moshuarve”, ka shkruar Lahaj.
Ndërsa, ka thënë se të gjithë ata që janë sfiduar me prindërit, të cilët kanë pasur nevojë për asistencë gjatë pleqërisë së tyre, e ndjejnë thellë dhimbjen, përuljen e nënçmimin që infermierja i ka bërë të moshuarës.
“Përdhunimi mbi prindërit, gjyshërit e të parët tanë, është akti më makabër që dikush mund ta bëjë duke pasur parasysh sfidën jetësore që kanë pasur me skamjen, regjimet historike, e po ashtu kontributin që kanë dhënë për kombin”, ka vijuar tenori.
Lahaj ka shprehur shqetësimin e tij për mënyrën sesi u trajtua e moshuara nga stafi i atij institucioni.
“Ajo që më shqetëson edhe më shumë është se sa me sportivitet e kishte këtë ngjarje i gjithë stafi i asaj shtëpie e të moshuarve në Pejë”, ka shkruar ai.
Sipas tij, rasti i infermieres nga Peja, vërteton se rinia ka humbur respektin ndaj prindërve, traditën e shenjtë shqiptare dhe respektin ndaj të moshuarve.