Ministri i Bujqësisë, Faton Peci, ka bërë të ditur se vendimi i Shkallës së dytë të Gjykatës Komerciale ka kundërshtuar vendimin e shkallës së parë lidhur me çështjen e lirimit të pronës në Zonën Industriale që lidh Prishtinën me Fushë-Kosovën.
Ministri Peci e ka cilësuar vendimin e shkallës së parë si të amatoresk dhe joprofesional, ndaj “zhvatësve të pronës që po shfrytëzohet pa marrëveshje kontraktuale nga operatori ekonomik Patroni”.
Ministri ka bërë të ditur se, në përputhje me paralajmërimet e tij të mëparshme, në lokacionin në fjalë do të ndërtohet një objekt i ri për Ministrinë e Bujqësisë, Pylltarisë dhe Zhvillimit Rural, si dhe për agjencitë vartëse.
“Sikurse edhe kemi paralajmëruar, në atë lokacion do të ndërtohet objekti i ri i Ministrisë së Bujqësisë, Pylltarisë dhe Zhvillimit Rural dhe Agjencive vartëse në mënyrë që t’i plotësojmë kushtet për akreditimin në IPARD”, ka shkruar ai në Facebook.
Peci ka theksuar se angazhimi i tij si ministër është i përkushtuar dhe i vendosur, për të rikthyer edhe pronën në Ulpianë dhe për të pastruar gjendjen në Stankaj të Pejës.