Lista Serbe ka shprehur kundërshtimin e saj ndaj ndërtimit të një stacioni policor në Zubin Potok dhe se ky vendim synon të ndezë tensionet dhe të përkeqësojë situatën në veri të Kosovës.
“Njoftimi për ndërtimin e një stacioni policor pranë shkollës fillore dhe kopshtit në Zubin Potok, së bashku me konfiskimin e paligjshëm të tokës nga institucionet arsimore, për akomodimin e policisë njëkombëshe të Kurtit, të cilën serbët nuk e përjetojnë si pjesë e komunitetit, ka shkaktuar pakënaqësi te qytetarët në veri të Kosovës, e veçanërisht në komunën e Zubin Potakut, dhe është shembull i presionit institucional të Prishtinës ndaj popullit serb”, thuhet në qëndrim.
Lista Serbe po ashtu ka theksuar se ky vendim është një injorim i thirrjeve të ndërkombëtarëve për shtensionim dhe zbatim të marrëveshjes për formimin e Asociacionit të Komunave me Shumicë Serbe.
“I bëjmë thirrje përfaqësuesve ndërkombëtarë që ta frenojnë Kurtin dhe të parandalojnë përshkallëzimin e situatës në terren dhe vazhdimin e militarizimit të komunave tona”.
Gjithashtu ata kanë kërkuar reagim nga EULEX-i dhe KFOR-i, të cilët kanë përgjegjësi për sigurinë e të gjithë qytetarëve, por kanë shprehur dyshime se ky veprim është në përputhje me objektivat e deeskalimit të situatës.
“Kërkojmë gjithashtu reagimin e EULEX-it dhe KFOR-it, të cilët janë përgjegjës për sigurinë e të gjithë qytetarëve, por besojmë të vetëdijshëm se kjo lëvizje nuk është një hap në drejtimin e duhur në kuptimin e deeskalimit të situatës”, përfundon komunikata.