Kryeministri i Shqipërisë, Edi Rama, sqaroi nga podkasti i tij mënyrën se si do të zbatohet në praktikë akti normativ për uljen e akcizës së karburanteve, një vendim i bërë publik më herët nga qeveria.
Rama shpjegoi se mekanizmi parashikon ndërhyrje automatike në momentin kur çmimet në treg kapërcejnë pragjet e përcaktuara.
Konkretisht, ulja e akcizës me 20% për naftën do të hyjë në fuqi sapo çmimi të kalojë 220 lekë për litër, ndërsa për benzinën pragu është 200 lekë për litër.
Sipas tij, këto kufij janë vendosur për të garantuar një reagim të balancuar ndaj zhvillimeve në tregjet ndërkombëtare, mbi të cilat vendi nuk ka kontroll.
“Këtë javë kemi miratuar edhe aktin e premtuar normativ për uljen e akcizës së naftës, në momentin kur nafta, si pasojë e impaktit të luftës mbi tregjet ndërkombëtare, të kalojë limitin e 220 lekëve. Pra, ulja e akcizës me 20% është një masë që hyn në fuqi menjëherë kur çmimi i naftës kalon 220 lekë për litër dhe ai i benzinës 200 lekë për litër. Këto pragje janë paracaktuar për të garantuar një ndërhyrje të drejtë dhe të balancuar në raport me zhvillimet e tregut, të cilat janë zhvillime që ne nuk i kemi në dorë, nuk jemi shkaktarë të tyre dhe nuk kemi as fuqinë që t’i ndalojmë, përveçse kemi detyrimin që t’i trajtojmë në funksion të amortizimit të goditjes së menjëhershme mbi konsumatorët, pa cenuar, nga ana tjetër, stabilitetin e financave publike në një kohë kur pasiguria në tregjet ndërkombëtare mbetet e lartë dhe po aq edhe dinamike”, tha Rama.
Mes tjerash, Rama tregoi se kjo masë do të mbetet në fuqi deri në stabilizimin e plotë të situatës ndërkombëtare.
“Masa do të mbetet në fuqi deri në stabilizimin e plotë të situatës ndërkombëtare, ndërsa Bordi i Transparencës, që është vënë në lëvizje, do të mbetet garant i çdo zhvillimi në tregjet globale për të reflektuar në mënyrë të drejtë dhe të verifikueshme atë çka duhet të ndodhë në tregun vendas. Ky është një reagim i duhur, i matur në kohë, që garanton vendimmarrje të shpejta, që mishëron përgjegjësi të plotë dhe që do të bëjë të mundur që qytetarët, drejtuesit e automjeteve, të mos abuzohen nga distributorët e naftës. Masat për të gjithë ata që do të shkelin çmimin e përcaktuar nga Bordi i Transparencës, në bazë të tregjeve, do të jenë drastike”, u shpreh Rama.