Ministri i Mbrojtjes, Ejup Maqedonci, deklaroi se parakalimi i Forcës së Sigurisë së Kosovës (FSK) dhe i Policisë së Kosovës është një simbol i forcës dhe i përkushtimit të Kosovës ndaj sigurisë dhe mbrojtjes së territorit të saj.
Parakalimi u mbajt për të shënuar 25-vjetorin e çlirimit të vendit tonë, teksa Maqedonci ka thënë se edhe 25 vjet pas marshit të UÇK-së shumëçka ka ndryshuar, por emocionet mbesin të njëjtat.
“Trina, Arbëri, Zana e Klintoni, Melosi dhe Arbesa janë në mesin e mbi 1500 ushtarëve të Forcës së Sigurisë së Kosovës që marshuan sot me rastin e 25 vjetorit të çlirimit të Kosovës. Me ta ishin edhe Leotrimi, Drini, Luani e dhjetëra tjerë ushtarak të rinj, fëmijë e familjarë dëshmorësh të UÇK-së e që janë dëshmia më e mirë e vazhdimësisë sonë për liri, siguri e sovranitet. 25 vite pas marshit triumfues të Ushtrisë Çlirimtare të Kosovës, shumëçka ka ndryshuar, por emocionet dhe ndjenjat mbesin përjetësisht me të gjithë ne. Sikur edhe amaneti i përbashkët që ta bëjmë Kosovën një vend më të mirë për të gjithë!
Parakalimi i Forcës së Sigurisë së Kosovës, së bashku me Policinë e Kosovës, i organizuar për këtë rast të veçantë, është një shenjë e fuqishme e forcës dhe përkushtimit të Kosovës ndaj sigurisë dhe mbrojtjes së territorit të saj. Në këtë paradë, u shfaq po ashtu një pjesë e fuqisë sonë bashkëkohore dhe angazhimi për të mbrojtur lirinë dhe sovranitetin tonë në mënyrë të përkushtuar”, ka shkruar Maqedonci në Facebook.
Marshi i UÇK-së, ka theksuar Maqedonci, ishte shenjë e qartë e vendosmërisë së popullit të Kosovës për të fituar lirinë.
“Në këtë 25-vjetor të Çlirimit të Kosovës, ndjejmë thellësisht rëndësinë e marshimit triumfues të Ushtrisë Çlirimtare të Kosovës në vitin 1999, së bashku me trupat mike të NATO’s që ndaluan dhunën e gjenocidin ndaj popullit të Kosovës. Kujtojmë me respekt dhe admirim guximin dhe përkushtimin e tyre për të luftuar për lirinë tonë. Marshimi i tyre triumfues ishte një shenjë e qartë e vendosmërisë së popullit tonë për të përballuar sfidat dhe për të fituar lirinë dhe pavarësinë për të gjithë qytetarët e Kosovës.
Në këtë ditë të rëndësishme, kemi një ndjenjë krenarie për të gjithë ata që kanë dhënë kontributin e tyre në rrugën drejt lirisë dhe pavarësisë së Kosovës. Le të festojmë bashkë këtë ditë të madhe të historisë sonë dhe të përkujtojmë me krenari dhe respekt gjeneratat e mëparshme dhe të tashme që kanë luftuar dhe vazhdojnë të japin kontribut për lirinë dhe pavarësinë tonë. Kosova është një vend i lirë dhe i pavarur, dhe sot festojmë dhe mbrojmë me krenari trashëgiminë tonë historike. Gëzuar 25-vjetorin e Çlirimit të Kosovës!”, ka shtuar Maqedonci.