Ministri i Mbrojtjes, Ejup Maqedonci, është takuar me shefin e EULEX-it, Giovanni Pietro Barbano, gjatë të martës së 14 nëntorit.
Gjatë këtij takimi u diskutua situata e sigurisë në Kosovë pas sulmit terrorist të 24 shtatorit në Banjskë të Zveçanit.
“Sulmi terrorist i 24 shtatorit ka ngjallur shqetësim te të gjithë, mirëpo është menaxhuar në mënyrën jashtëzakonisht profesionale nga ana e Policisë së Kosovës dhe për këtë ishim që të dy dakord”, ka thënë ministri Maqedonci.
Maqedonci gjatë këtij takimi e ka falënderuar shefin e EULEX-it për mbështetjen ofruar Policisë së Kosovës gjatë kësaj kohe, përmes prezencës së EULEX-it në veri, gjë që ka kontribuuar në stabilizimin e situatës.
Maqedonci ka thekuar se në koordinim të vazhdueshëm me Policinë e Kosovës dhe KFOR-in, është duke u monitoruar situata me kujdes të shtuar që ngjarje të tilla të mos përsëriten më.