Gjatë një vizite zyrtare në Itali, ministri i Mbrojtjes, Ejup Maqedonci, ka takuar Admiral Giuseppe Cavo Dragone, shef stafi i Mbrojtjes i Italisë dhe kryesues i ardhshëm i Komitetit të NATO-s.
Siç ka njoftuar ai në një postim në Facebook, gjatë takimit ka diskutuar për situatën aktuale gjeopolitike, zhvillimin e Forcës së Sigurisë së Kosovës (FSK), bashkëpunimin bilateral me Italinë në fushën e mbrojtjes, si dhe synimet e Kosovës për anëtarësim në NATO dhe BE.
Ministri Maqedonci e ka falënderuar Admiral Dragone për bashkëpunimin e shkëlqyer të deritanishëm dhe mbështetjen e vazhdueshme të Italisë përmes trupave të KFOR-it dhe EULEX-it.
Admirali Cavo Dragone ka shprehur vlerësim për menaxhimin e suksesshëm të sulmit terrorist në veri të vendit dhe shfaq gatishmërinë për të përkrahur Kosovën në rrugën drejt anëtarësimit në Programin e Partneritetit për Paqe.
Po ashtu, Maqedonci ka bërë të ditur se bashkë janë dakorduar se ruajtja e stabilitetit në Ballkan dhe koordinimi me partnerët strategjikë janë prioritetet që garantojnë sigurinë dhe zhvillimin e rajonit.