Dje është mbajtur takimi i dytë i Këshillit të Partneritetit ndërmjet Kosovës dhe Mbretërisë së Bashkuar.
“Delegacioni i Republikës së Kosovës ishte i përbërë nga përfaqësues nga Ministria e Punëve të Jashtme dhe Diasporës, Ministria e Punëve të Brendshme, Ministria e Mbrojtjes dhe Ministria e Industrisë, Ndërmarrësisë dhe Tregtisë. Temat kryesore të takimit ishin bashkëpunimi dypalësh në fushën e ekonomisë, mbrojtjes, sigurisë, drejtësisë dhe mbështetja e Mbretërisë së Bashkuar në organizata ndërkombëtare, me theks të veçantë në Këshillin e Evropës”, thuhet në njoftim.
Në këtë takim është theksuar rëndësia e rritjes së bashkëpunimit ekonomik dhe shkëmbimit tregtar mes dy shteteve, temë të cilës i ka dhënë prioritet edhe sekretari i Jashtëm britanik, Lordi David Cameron, pas vizitës së tij në Kosovë dhe takimet që kishte me krerët e shtetit.
Në këtë takim është diskutuar në detaje për bashkëpunimin dypalësh, u trajtuan marrëveshjet e iniciuara dypalëshe, si dhe u theksua rëndësia e thellimit të bashkëpunimit, veçse mjaft të avancuar, në fushën e mbrojtjes dhe sigurisë.