Të dielën e 20 nëntorit ka pasur vërshime në disa qytete të Kosovës, si pasojë e reshjeve të shumta të shiut.
Ministri i Mbrojtjes, Armend Mehaj, ka thënë se autoritetet zyrtare janë duke e monitoruar pandërprerë situatën në terren.
Ai nëpërmjet një postimi në Facebook ka shkruar se FSK është e gatshme çdoherë të ndërhyjë në situata emergjente.
“Pas reshjeve të mëdha që shkaktuan edhe vërshime në shumë pjesë të vendit, autoritetet tona zyrtare janë duke e monitoruar pandërprerë situatën në terren. FSK si çdoherë, në secilën situatë emergjente, është e gatshme plotësisht, me të gjitha kapacitetet e saj në dispozicion, që të realizoj detyrën ligjore të mbështetjes ushtarake të autoriteteve civile dhe qytetarëve tanë pa dallim”, ka shkruar ai në rrjetin social Facebook.
Si rezultat i kësaj, situatë më e rënduar paraqitet në Pejë, Gjakovë, Deçan, Istog, Junik, Vushtrri e Mitrovicë.
Në qytetin e Pejës dhe Istogut situata aktualisht raportohet nga banorët se është shumë më e rëndë ku tashmë sasia e ujit ka përfshirë shumë lagje.