Guvernatori i Bankës Qendrore të Kosovës, Fehmi Mehmeti, është shprehur i sigurtë se Kosova do ta fitojë rastin e arbitrazhit ndaj institucionit financiar jobankar “Monego”.
Mehmeti ka theksuar se “Monego”, deri më tash i ka humbur te gjitha rastet në gjykatat e Kosovës, dhe sipas tij procesi në arbitrazh do jetë në favor të shtetit të Kosovës.
“Kemi pasë dy raste të tilla, njëra prej tyre “Monego” i ka bërë gjitha ankesat dhe i ka humbë të gjitha rastet, ne i kemi mbikëqyr prej afër, kemi marrë masa të vazhdueshme. Jemi ballafaqu në arbitrazh, me dëshmitë tona me faktet që i kemi pas, jemi shumë të sigurt që procesi do të fitohet, 99.9 % do të vendoset në favor të shtetit të Kosovës”, ka deklaruar ai në emisionin Five.
Në vitin 2019, Banka Qendrore e Kosovës (BQK), kishe marrë vendim për revokimin e licencimit për dy institucionet mikrofinanciare “IuteCredit” dhe “Monego”.
Arsyetimi i BQK-së, thoshte se këto dy institucione mikrofinanciare aplikuan normë të lartë të interesit në kredi, duke dalë kështu jashtë planit që kishin paraparë.
“Normat e interesit që kanë aplikuar këto institucione janë jashtë çdo standardi”, kishte deklaruar, Guvernatori i Bankës Qendrore të Kosovës, Fehmi Mehmeti.
Pas këtij vendimi, “Monego”, e kishte paditur BQK-në, por që nuk e kishte fituar asnjë rast. Tashmë rasti gjendet në Gjykatën e Arbitrazhit.