Ministria e Mbrojtjes ka bërë të ditur se sot është zhvilluar ceremonia solemne e pranim-dorëzimit të autoblindave të reja, të prokuruara nga Shtetet e Bashkuara të Amerikës, për Forcën e Sigurisë së Kosovës (FSK).
Në këtë ngjarje morën pjesë kryeministri Albin Kurti, ministri i Mbrojtjes Ejup Maqedonci, atasheu i ushtrisë në Ambasadën e SHBA-së në Prishtinë, nënkolonel Jonathan Shaë, si dhe Komandanti i FSK-së, gjenerallejtënant Bashkim Jashari.
Ky investim sipas MM në njoftim thuhet se u vlerësua si një hap i rëndësishëm në procesin e modernizimit të FSK-së, duke e pajisur atë me teknologji dhe mjete të avancuara për realizimin e misionit kushtetues. Ministri Maqedonci theksoi se mbështetja e vazhdueshme nga Shtetet e Bashkuara, si partner strategjik dhe i pazëvendësueshëm, është dëshmi e miqësisë dhe bashkëpunimit të ngushtë mes dy vendeve.
“Me një dedikim të palëkundur ndaj vlerave perëndimore dhe doktrinës së ushtrisë amerikane, ne jemi të angazhuar për një ngritje të qëndrueshme dhe progresive të forcës sonë, duke adoptuar sisteme armatimi në përputhje me standardet e NATO-s”, tha ai.
Sipas Maqedoncit, ky përkushtim do të garantojë që FSK të jetë një forcë moderne, e ndërveprueshme dhe e gatshme të bashkëpunojë me ushtritë e vendeve anëtare të aleancës euro-atlantike, me synim krijimin e një të ardhme të sigurt dhe të qëndrueshme për të gjithë qytetarët.
Kurti: Autoblindat e reja nga SHBA për FSK-n, dëshmi e partneritetit tonë të palëkundur