Ministria e Industrisë, Tregtisë dhe Ndërmarrësisë (MINT), përmes një postimi, ka njoftuar se është rritur numri i vizitorëve në Republikën e Kosovës.
MINT njofton se numri i përgjithshëm i vizitorëve në Kosovë gjatë muajit qershor të këtij viti ka pasur rritje prej 29 për qind, krahasuar me qershorin e vitit të kaluar. Nga numri i përgjithshëm i vizitorëve 60.98 për qind ishin të jashtëm kurse 39.02 për qind ishin vendorë.
“Sipas Agjencisë së Statistikave të Kosovës, statistikat e Hotelerisë për muajin qershor 2023 rezultojnë me 13.3 % rritje të vizitorëve të jashtëm, krahasuar me qershorin e vitit 2022”, thuhet në njoftimin e MINT-it.
Në këtë njoftim thuhet se në total 29 mijë e 317 vizitorë të huaj, nga të cilët, numri më i madh është nga: Shqipëria, Gjermania, Turqia, Zvicra e të tjerë.
Tutje, MINT njofton se vizitat janë evidentuar nga qëndrimet në hotelet e Kosovës, kurse vizitat ditore nuk hyjnë në këtë evidencë e që nëse llogariten përqindja do të ishte shumë më e lartë.