Lidhur me mosdekretimin e Blerim Isufajt për kryeprokuror të Shtetit nga presidentja Vjosa Osmani, kryetari i Partisë Demokratike të Kosovës, Memli Krasniqi, ka thënë se ky vendim është konfirmim i asaj që ka thënë kryeministri Albin Kurti në Kuvend të Kosovës.
Sipas Krasniqit, kryeministri kishte thënë se prokurori Blerim Jusufaj nuk do të bëhet kryeprokuror Shteti.
“Neve, dje, presidentja na ka konfirmuar atë se çfarë e ka deklaruar kryeministri para disa muajve në Kuvendin e Kosovës, që kurrë sa të jem unë kryeministër, ky njeri nuk bëhet kryeprokuror dhe ky është konfirmim”, ka deklaruar Krasniqi për RTK Prime.
Ndër të tjera, ai ka thënë se kjo është hera e parë që ndodh në histori të Kosovës dhe ka shtuar se PDK-ja të martën menjëherë pas këtij veprimi, ka mbledhur ekspertët për t’u shqyrtuar nëse një gjë e tillë duhet të ketë përgjigjen e adresimit në Gjykatën Kushtetuese ose jo.
“Unë besoj që një përgjigje të tillë ne do ta japim shumë shpejt, por ajo që mund të them me bindje është se presidentja tashmë e ka shkelur Kushtetutën”, ka deklaruar kryetari i PDK-së, Krasniqi.