Drejtoresha e Arsimit në Komunën e Prishtinës, Besianë Musmurati, ka thënë se me nismë të vetë nxënësve të Prishtinës, nga kjo e enjte siguria dhe politikat anti-dhunë janë prioritet i secilës shkollë në Komunën e Prishtinës.
Ajo ka njoftuar përmes një postimi në llogarinë e saj në Facebook, duke thënë se së bashku me shumë shkolla fillore të Prishtinës, kanë lansuar sot fushatën “Çohu kundër dhunës”, e cila synim kryesor do të ketë parandalimin, identifikimin, raportimin dhe trajtimin e dhunës nga këndvështrimi i fëmijëve.
“Me nismë të vetë nxënësve të Prishtinës, nga sot siguria në shkollë dhe politikat anti-dhunë janë prioritet i secilës shkollë në komunën tonë! Së bashku me shumë shkolla fillore të Prishtinës, po lansojmë sot fushatën “Çohu kundër dhunës”, e cila synim kryesor do ta ketë parandalimin, identifikimin, raportimin dhe trajtimin e dhunës nga këndvështrimi i fëmijëve. Përmes kësaj fushate, mijëra nxënës në Prishtinë do të përfshihen direkt në aktivitete ndërgjegjësuese mbi dhunën, ndërsa indirekt në proceset e vendimmarrjes mbi politikat e reja të DKA-së për sigurinë në shkolla”, ka shkruar Musmutari.
Sipas saj, dhuna e çfarëdoshme nuk ka vend në shoqëri, prandaj ka theksuar se do të trajtohet ajo.
“Dhuna e çfarëdo llojshme nuk ka vend në shoqërinë tonë, prandaj ne do ta trajtojmë atë; fëmijët kanë të drejtë të përfshihen në politikë bërje, prandaj ata do të dëgjohen”, ka përfunduar Musmurati.