Ministrja e Arsimit, Shkencës, Teknologjisë dhe Inovacionit, Arbërie Nagavci, në një postim në rrjetin social në Facebook, ka shkruar se i ka informuar drejtorët për impelementimin e mësimit dual që do të fillojë nga 1 shtatori në katër profile, kuzhinier, asistent i restorantit, floktar dhe murator.
Tutje, ajo ka thënë se si ministre e Arsimit është në dijeni për sfidat me të cilat ballafaqohen shkollat profesionale si dhe me numrin jo të madh të nxënësve të interesuar për t’i ndjekur këto shkolla.
Nagavci ka shprehur besimin se “ofrimi i një modeli të ri të mësimit do të jetë përparësi për shkollat dhe do të shtojë interesimin e nxënësve për t’u regjistruar në këto drejtime. Drejtorët i njoftova po ashtu se jemi duke rishikuar formulën financiare, cila rregullon çështjen e shkollave profesionale në mënyrë që t’ua lehtësojmë punën e tyre”.
Çështja e normave është brengë e mësimdhënësve ka thënë më tej e para e arsimit në Kosovë.
“Andaj kemi punuar paralelisht në ofrimin e mësimit dual, por edhe që të sigurohemi që mësimdhënësit të cilët janë në proces të mos i humbin vendet e punës. U dakorduam që të kemi takime të rregulla në mënyrë që bashkarisht t’i zgjidhim problemet e të përmirësojmë gjendjen në arsimin profesional”, ka shkruar në rrjetin sicial ministrja Nagavci.