Ministrja e Arsimit, Arberie Nagavci, ka reaguar pas publikimit të disa videove, ku në një kopsht të fëmijëve në Fushë-Kosovë, shihen punëtorët e këtij kopshti duke e tërhequr zvarrë fëmijën e vogël të moshës 3-vjeçare.
“Thellësisht e shqetësuar nga pamjet e publikuara të një çerdheje në Fushë Kosovë. E dënoj ashpër dhunën e ushtruar ndaj një të mituri në këtë institucion parashkollor”, ka shkruar ajo.
“Dhuna është e papranueshme andaj, pres që kushdo që ushtron dhunë të marrë dënimin e merituar”, ka shtuar Nagavci.
Më tej, ministrja ka ngritur dyshime se ky rast mund të jetë fenomen dhe jo rast i izoluar.
“Ajo që është më shqetësuese sipas pamjeve të publikuara, është se nuk bëhet fjalë vetëm për një person por më shumë edukatore të involvuara e që e shton dyshimin se nuk është fenomen i izoluar”, ka thënë ajo.
Ndërkohë, ajo ka treguar se Inspektorati i Arsimit ka dalë në vendin e ngjarjes.
“Inspektorati i Arsimit ndodhet në këtë institucion dhe sapo të pranojmë raportin, do të ndërmarrim masa të menjëhershme”, ka theksuar ajo.
Nagavci ka përfunduar duke thënë se “MAShTI, komunat dhe në përgjithësi si institucione kemi obligim të kujdesemi e të sigurohemi për mirëqenien e të gjithë fëmijëve”.