Ministrja e Arsimit, Arbërie Nagavci, në një konferencë për shtyp të mbajtur të premten, ka thënë se legjislacioni për vlerësimin e mësimdhënësve është drejt finalizimit nga grupi punues.
“Grupi punues është në finalizim dhe gjatë muajit mars do ta kemi në dëgjim publik edhe shqyrtim paraprak, besoj që do të jetë në gjysmën e parë të muajit mars”, ka deklaruar Nagavci.
Ajo, nëpërmjet një konference për media të premten e 24 shkurtit, ka njoftuar se tash e tutje do të mbajë konferenca të rregullta javore.
Gjithashtu, Nagavci ka folur për disa nga punimet që Ministria e Arsimit ka bërë në muajt e parë të këtij viti.
“Kemi vendosur mekanizma për sigurimin e integritetit akademik. Kemi paraparë që të kemi edhe komitetin etik në nivel qendror përveç këshillave të etikës në secilin prej institucioneve të arsimit të lartë. Kemi miratuar dy projektligje në kuadër të procesit të Berlinit, të cilat janë ratifikuar në Kuvend. Jemi në proces të përpunimit të aplikimeve për përzgjedhjen e katër anëtarëve të Këshillit Shtetëror të Cilësisë”, është shprehur Nagavci.
Ndër të tjera, ajo ka thënë se kanë finalizuar edhe disa dokumente.
“Deri në fund të këtij viti do të finalizojmë kurrikulën për edukimin në fëmijërinë e hershme. Kemi finalizuar gjatë këtij viti dy udhëzime administrative për mësimdhënësit. Në janar kemi publikuar në platformën e diskutimeve publike draftet e këtyre udhëzimeve të cilat kanë të bëjnë me mësimdhënësit”, ka deklaruar Nagavci.
Ajo ka folur edhe për vënien e gurthemelit të objektit të ri të Fakultetit të Shkencave Matematiko-Natyrore, që është bërë të enjten e kësaj jave, e që sipas saj, ky objekt kap vlerën e mbi 9 milionë eurove.
“Ky objekt kap vlerën 8.9 milionë euro dhe një pjesë e vogël është bashkëfinancuar nga Universiteti i Prishtinës me mjetet e buxhetit të Kosovës, ndërkaq ndërtimi i objektit i cili pjesën më të madhe të fondeve do të financohet nga BE-ja, do të realizohet nga Zyra e Kombeve të Bashkuara, UNOPS”, ka deklaruar Nagavci.
Gjithashtu, e para e Arsimit ka theksuar se objekti i ri i FSHMN-së planifikohet të përfundojë në verën e vitit të ardhshëm, në mënyrë që vitin e ri akademik studentët të nisin në objektin e ri.