Një person është ndaluar për 48 orë, nën dyshimin se të dielën në Klinë ka kryer veprën penale “vrasje e rëndë në tentativë” ndaj një gruaje, ndërsa dyshohet se ka sulmuar fizikisht edhe një grua tjetër.
Zëdhënësi i Prokurorisë Themelore në Pejë, Shkodran Nikçi, ka bërë të ditur për Dukagjinin se ndalimi i të dyshuarit është bërë me urdhër të Prokurorit të Shtetit.
“Personi i dyshuar me urdhër të Prokurorit të Shtetit është ndaluar për 48 orë për veprën penale ‘vrasje e rëndë në tentativë’. Brenda afatit ligjor do të parashtrohet kërkesa për sigurimin e tij në procedurë penale. Për ndriçimin e këtij rasti janë duke u ndërmarrë të gjitha veprimet e nevojshme hetimore”, ka deklaruar Nikçi.
Rasti ka ndodhur të dielën, rreth orës 18:30 në Klinë.
Sipas Policisë së Kosovës, viktimat janë dërguar për tretman mjekësor, ndërsa i dyshuari pas arrestimit ishte dërguar në repartin e psikiatrisë, nën mbikëqyrjen e njësive policore.
Hetimet për rastin janë në vazhdim.