Në garë për Këshillin Kombëtar janë, gjithsej, 420 kandidatë, ndërsa me automatizëm për në Këshill do të hyjnë, ish-presidentët, ish-kryeministrat, ish-kryetarët e Kuvendit, dhe ish-kryetarët e PD-së deri në momentin e mbledhjes së Këshillit Kombëtar.
Me automatizëm zgjidhen kandidatë ata anëtarë, që janë në detyrë të kryesisë së Partisë, kryetarët e degëve të PD-së, deputetët dhe ministrat në detyrë, anëtarë të PD-së, kryetarët e Bashkive dhe kryetarët e Këshillave të Bashkive dhe të Qarkut, të cilët i përkasin Partisë Demokratike.
Komisioni i Rithemelimit ka nisur punimet e Kuvendit Kombëtar të Partisë Demokratike në Pallatin e Kongreseve, ku pjesëmarrës janë 1800 delegatë, të cilët do të zgjedhin Këshillin e ri Kombëtar.
Teksa rreth 35 deputetë të PD kanë braktisur Kuvendin e Rithemelimit, disa janë bashkuar për herë të parë me ”Rithemelimin”.
Në fotot brenda sallës, të pranishëm janë figurat e vjetra të rikthyera, si, Topalli e Imami, të cilët pranuan ftesën e Sali Berishës për rikthim në PD, raporton Top Channel.
Të pranishëm janë edhe deputeti Kasem Mahmutaj dhe Ina Zhupa, të cilët i janë bashkuar për herë të parë Kuvendit të Berishës.
Ky i fundit, është ulur mes dy zonjave në sallë, bashkëshortes së tij dhe Albana Vokshit.