Nol Nushi nga radhët e Partisë Socialdemokrate(PSD) ka thënë se pret që nga takimi i Ohrit të arrihet një marrëveshje në mes Kosovës dhe Serbisë dhe se e njëjta, do të jetë e dëmshme për shtetin e Kosovës.
I ftuar në “FIVE” të RTV Dukagjini, Nushi ka thënë se gatishmëria e Kosovës për të pranuar një marrëveshje në Ohër është e lartë.
“Po, unë besoj që ka marrëveshje të shtunën sç kam besuar se do të ketë marrëveshje edhe herën e kaluar kur ishte takimi i fundit dhe u bë dakordimi për planin franko-gjerman. Kjo për faktin se tanimë, palët kanë hyrë në fazën përfundimtare të dialogut dhe nuk lejohet më shterja e tij nga ata që po e fasilitojnë dialogun dhe këtu përgjegjës janë të dyja palët por unë po flas për palën tonë se kjo është më e rëndësishme. Janë gju kartat e zvarritjeve, besa kur kanë ndodhë ato zvarritje kanë bërë dëm kështu që, durimi ndërmjet ndërmjetësve të humbet dhe sot, edhe në gjuhën e tyre dhe në informatat që dalin prej këtyre faktorëve të ndryshëm ndërkombëtar e vebndor tregojnë që presioni është i lartë dhe gatishmëria e kosovës për t’a pranuar këtë marrëveshje është e lartë”, ka deklaruar ai.
Ndër të tjera, Nushi vlerëson se një marrëveshje e tillë do të ishte e dëmshme për Kosovën.
“Absolutisht e dëmshme sepse kemi humbur rastin që përmes një marrëveshje gjithpërfshirëse ta fitojmë njohjen përmes së cilës shteti i Kosovës do të konsilodohej përfundimisht nga jashtë”, ka deklaruar ai gjersa ka theksuar se Kosova po hyn në një proces pa ditur kohëzgjatjen e saj.
Kryeministri i Kosovës, Albin Kurti, dhe presidenti i Serbisë, Aleksandër Vuçiq, të shtunën e 18 marsit do të zhvillojnë një takim të nivelit të lartë në Ohër të Maqedonisë së Veriut.
Kryeministri Kurti dhe presidenti i Serbisë, Vuçiq tashmë kanë konfirmuar pjesëmarrjen e tyre në këtë takim.
I dërguari i posaçëm i Uashingtonit për Ballkanin Perëndimor, Gabriel Escobar, do të marrë pjesë në cilësinë e vëzhguesit në rundin e ri të dialogut mes Kosovës dhe Serbisë, që do të mbahet më 18 mars në Ohër të Maqedonisë së Veriut.