Në seancën e Kuvendit të Serbisë ku po diskutohej për rrjedhën e dialogut dhe propozimin franko-gjerman, në kuadër të dialogut në mes të Kosovës dhe Serbisë ka tejkaluar në përplasje verbale dhe fizike.
Opozita e ka pritur presidentin e Serbisë, Aleksandar Vuçiq, me parulla si “E ke dorëzuar Kosovën”, “jo ultimatum, jo kapitullim”, derisa ai po fliste për Kosovën.
Në këto parulla ishte edhe një fotografi e ish-politikanit serb, Oliver Ivanoviq, me mbishkrimin “Do të përgjigjesh”, si dhe “Vuçiq e tradhtove Kosovën”.
Në nisje të debatit, Vuçiq ka thënë se qëllimi “i ditës së sotme nuk është që përgjegjësia të bartet në këtë institucion apo te populli”.
Opozita bënte thirrje “Kosova është zemra e Serbisë” dhe “Nuk do të heqim dorë nga Kosova”, dhe Vuçiq i përgjigjej “tani e kujtove”, raporton Danas.
Ndërkaq, në këtë seancë, Vuçiq teksa ka komentuar iniciativën franko-gjerman, ka thënë se 90 për qind e asaj që është publikuar është e saktë.
Ai ka theksuar se plani që ai posedon ka pak dallime me atë që është publikuar.
“Plani që kam marrë nuk është publikuar, ka dallime të vogla”, ka thënë ai.
Ai posaçërisht ka theksuar pikën 4, përkatësisht paragrafin e dytë, ku sipas tij, thuhet se “Serbia nuk do ta kundërshtojë anëtarësimin e Kosovës në asnjë organizatë ndërkombëtare”.
Sa i përket themelimit të Asociacionit të komunave me shumicë serbe, Vuçiq ka thënë se duhet të jetë ajo që është nënshkruar në Bruksel.
“Asociacioni nuk mund të jetë model i ndonjë organizate joqeveritare, duhet të jetë ajo që është nënshkruar në Bruksel”, shtoi ai.