Presidentja e Kosovës, Vjosa Osmani, ka përkujtuar atdhetarin dhe gazetarin Enver Maloku, në 24 vjetorin e vrasjes.
Në njoftimin për media në zyrën e presidentes, thuhet se Osmani kërkoi zbardhjen e vrasjes dhe kapjen e autorëve duke i dërguar para drejtësisë.
“Në 24 – vjetorin e vrasjes së atdhetarit e gazetarit Enver Maloku, e kujtojmë me respekt bashkëpunëtorin e presidentit historik, dr.Ibrahim Rugova dhe drejtuesin e Qendrës për Informim të Kosovës, zërin e të vërtetës sonë nga kohët e errëta”, thuhet në njoftimin e presidencës
“Siç bëri ai për të vërtetën, duhet të bëjmë ne, duke zbardhur autorët e vrasjes së tij dhe duke i përballë me drejtësinë”, vijon njoftimi.
Edhe kryetari i AAK-së, Ramush Haradinaj ka shkruar se aktivisti dhe gazetari Enver Maloku, do tw kujtohet gjithmonë si një nga intelektualët e parë që iu bashkua lëvizjes për liri.
“Si një atdhedashës që ishte, dha gjithçka për lirinë e fjalës, për popullin e Kosovës. Roli i tij në ndërkombëtarizimin e çështjes së Kosovës, ishte i jashtëzakonshëm. Qoftë i përjetshëm kujtimi për Enver Malokun!”, ka shkruar Haradinaj.
Të mërkurën e 11 janarit, janë bërë plot 24 vjet nga vrasja e gazetarit dhe anëtarit të LDK-së Enver Maloku, i cili ishte edhe njeri shumë i afërt me ish-presidentin e ndjerë Ibrahim Rugova.
Enver Maloku ishte udhëheqës i Qendrës për Informim në Kosovë, e cila gjatë viteve të 90-ta, shërbente si Agjenci Kombëtare e Lajmeve.
Maloku u vra më 11 janar të vitit 1999, në kohë lufte, teksa po kthehej në banesën e tij në Prishtinë, nga persona ende të panjohur.