Presidentja e Kosovës, Vjosa Osmani, ka udhëtuar për vizitë zyrtare në Kroaci, me ftesë të homologut të saj kroat, Zoran Milanoviq.
Fokusi i diskutimeve në mes të dy presidentëve do të jetë thellimi i mëtejmë i raporteve bilaterale dhe zhvillimet e fundit në vend dhe rajon.
“Në agjendë të vizitës së presidentes Osmani në shtetin kroat është edhe takimi me kryeministrin Andrej Plenkoviq, si dhe kryetarin e Parlamentit kroat, Gordan Jandrokoviq”, ka njoftuar Presidenca.
Në kuadër të kësaj vizite zyrtare, presidentja Osmani do të ketë vizitë edhe në Rijekë, ku ndër të tjera, do të takohet me komunitetin shqiptar në këtë komunë.
Sipas njoftimit të Presidencës kroate, udhëheqësit e të dyja shteteve do të diskutojnë për marrëdhëniet dypalëshe ndërmjet Kroacisë dhe Kosovës, situatën politike dhe të sigurisë në Evropën Juglindore, ngjarjet aktuale në veri të Kosovës dhe perspektivën evropiane dhe euroatlantike të Kosovës dhe të vendeve të tjera të Evropës Juglindore.
“Kroacia mbështet anëtarësimin e Kosovës në organizatat ndërkombëtare, duke përfshirë mbështetjen për dhënien e statusit kandidat për anëtarësim në Bashkimin Evropian”, thuhet në njoftimin e presidencës.
“Presidenti Milanoviç tashmë u ka bërë thirrje publikisht anëtarëve të BE-së që nuk e kanë njohur pavarësinë e Kosovës ta bëjnë këtë. Dhe në fjalimin e tij të fundit në Kombet e Bashkuara në Nju Jork, presidenti Milanoviç theksoi se Kroacia mbron njohjen universale të Republikës së Kosovës dhe të drejtën e saj për të ekzistuar si anëtare e barabartë e bashkësisë së kombeve”, përfundon njoftimi i presidencës.
Ndërkaq, presidentja Osmani në platformën X është shprehur e lumtur që po e nis këtë vizitë.