Në kuadër të vizitës së tij në Kiev, Kryesuesi i OSBE-së, njëherit edhe ministër i Punëve të Jashtme të Maqedonisë së Veriut, Bujar Osmani, ka njoftuar se ka takuar presidentin ukrainas, Volodymyr Zelensky.
Ai është shprehur i impresionuar me punën që po e bën, Zelenskyy, për të mbrojtur popullin e tij nga agresioni rus.
“Impresionuese sakrifica dhe angazhimi i Presidentit Zelensky për mbrojtjen e popullit ukrainas dhe guximi i tij në ballafaqimin me sfidat dhe pasojat e agresionit të Federatës Ruse kundër Ukrainës. I bëj thirrje Rusisë që menjëherë t’i japë fund agresionit”, ka shkruar Osmani.
Tutje, Osmani, ka shtuar se OSBE “mbështetë popullin ukrainas dhe do të vazhdojë nga afër ta vëzhgojë gjendjen”.
Mes tjerash Osmani ka theksuar se OSBE ka të gjithë mekanizmat dhe kapacitetin që t’u ndihmojë njerëzve nga zonat e përfshira në konflikt përmes punës në terren.
“Një nga hapat e para duhet të jetë kthimi i menjëhershëm i Misionit të OSBE-së në terren në Ukrainë”, ka thënë tutje Osmani.
Bujar Osmani viziton Kievin, pritet të takojë përfaqësues të lartë shtetëror të Ukrainës