Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka reaguar pasi një këshilltar i Ministrisë së Punëve të Jashtme dhe Diasporës paguhet mbi 7 mijë euro në muaj.
Tahiri ka thënë se “heshtja e qeverisë ndaj këtij skandali është shpërfaqje e hipokrizisë dhe mashtrimit politik”.
“Një qeveri e cila pretendon që angazhohet për barazi dhe drejtësi sociale raportohet se po shpenzon 7500 euro mujore për shërbimet e një këshilltari të jashtëm politik. Heshtja e qeverisë ndaj këtij skandali është shpërfaqje e hipokrizisë dhe mashtrimit politik. Folni mos shuni”, ka shkruar Tahiri.
Ministrja e Punëve të Jashtme dhe Diasporës, Donika Gërvalla, lidhur me këtë çështje ka thënë se vlera e 7 mijë e 500 eurove nuk është pagë mujore, por, sipas saj, është një shumë modeste për lobimin që Gani Jakupi e bën.
Lexo dhe: Gërvalla e quan modeste shumën prej 7 mijë e 500 eurosh që e merr Gani Jakupi
“Me këtë shumë modeste që nuk është pagë mujore është shumë modeste për gjithë lobimin që bën. Ai nuk është këshilltar i imi, ai ka një kontratë. Më vjen keq që Gani Jakupi përballet me një fushatë të tillë”, ka thënë ministrja e Punëve të Jashtme dhe Diasporës, Donika Gërvalla.