Ministria e Arsimit dhe ajo e Shëndetësisë do të paditen nga komunat pasi këto thonë se nga dy ministritë janë dëmtuar mbi 35 milionë euro.
Drejtori ekzekutiv i Asociacionit të Komuna të Kosovës, Sazan Ibrahimi, ka thënë se niveli qendror kishte nënshkruar kontrata kolektive, mirëpo barra financiare u kishte rënë komunave. Si rrjedhojë, sipas Ibrahimit, komunave u ka dalë problem.
“Në bazë të analizave të Asociacionit të Komunave të Kosovës, vlerësohet se dëmi i cili i është shkaktuar komunave me zbatimin e kontratave kolektikve duke iu marrë mjetet financiare komunave, është mbi 35 milionë euro dhe ne u kemi kërkuar dhe do të kërkojmë përsëri që këto mjete t’iu barten komunave në mënyrë që projektet kapitale, të cilat janë të parapara të zbatohen me këto mjete financiare të gjejnë zbatim”, ka thënë Ibrahimi për KP.
Ndër të tjera, sipas tij, niveli qendror ka ndaluar shumë projekte të parapara për t’u funksionalizuar si shkak i mosfunksionimit të bordit të OSHP-së.
Tutje, ai ka folur edhe për Asociacionin e Komunave Serbe për të cilën ka thënë se Qeveria e Kosovës do të krijojë një ekip që do të fillojë hartimin e statutit të këtij mekanizimi, hartim ky që do të dërgohet në Gjykatën Kushtetuese.
Ndërkaq, një shqetësim është ngritur nga ana e drejtorit Ibrahimi lidhur me furnizimin e artikujve shkollor.
“Me dijenin tonë, vetëm në një komunë janë dërguar librat shkollor dhe po presim që furnizimi me librat shkollor të ndodhë edhe në komunat tjera sepse koha është jashtëzakonisht e shkurtër”, ka thënë Ibrahimi gjersa ka theksuar se pret që MASHT-I të veprojë seriozisht dhe jo si vitin e kaluar.