Amer Alija, nga Fondi për të Drejtën Humanitare Kosovë (FDHK), ka njoftuar se në vigjilje të pesë vjetorit të zhdukjes së Mirjeta Zekës, është autorizuar nga familja e saj që ta përfaqësojë palën e dëmtuar pranë organeve përkatëse.
Kështu bëri të ditur ai përmes një postimi në llogarinë e tij në Facebook, teksa fajësoi Prokurorinë Themelore në Mitrovicë se e njëjta është treguar e paaftë në zbardhjen e rastit.
“Në prag të pesë vjetorit të zhdukjes së Mirjeta Zekës jam autorizuar nga familja e saj që ta përfaqësoj palën e dëmtuar pranë organeve kompetente. Në datën 31 mars të vitit 2019, Mirjeta Zeka është zhdukur në rrethana të panjohura dhe të pa ndriçuara deri më tani. Në datën 22 mars të vitit 2024 i kam dërguar prokurorit të rastit të Prokurorisë Themelore të Mitrovicës një parashtresë për informim lidhur me rastin dhe procedurën hetimore, në pajtim me Kodin e Procedurës Penale të Republikës së Kosovës pala e dëmtuar ka të drejtë të pranon informacione nga prokurori i shtetit i cili e zhvillon procedurën penale”.
Alija ka kërkuar që ky rast të transferohet në Prokurorinë Speciale të Republikës së Kosovës.
“Një muaj pas dërgimit të parashtresës dhe më shumë se pesë vite që nga zhdukja misterioze e Mirjeta Zekës, unë si përfaqësues i palës së dëmtuar kërkoj nga Prokuroria Themelore e Mitrovicës që të na njofton zyrtarisht me rrjedhën e hetimeve dhe në të njëjtën kohë kërkojmë që ky rast të transferohet në Prokurorinë Speciale të Republikës së Kosovës duke pas parasysh se Prokuroria Themelore në Mitrovicë është treguar e pa aftë në ndriçimin e rastit”, shkroi ai.