Plani franko-gjerman, për kryetarin e Aleancës së Ardhmërisë së Kosovës, Ramush Haradinaj, është i gatuar nga Shtetet e Bashkuara të Amerikës.
Kështu ka deklaruar ai në emisionin “Debat Plus”, në RTV Dukagjini, teksa ka thënë se ndonëse është i mbështetur nga pala franceze dhe gjermane, i njëjti draft e ka njohjen e ndërsjellë midis dy vendeve fqinje, Kosovës dhe Serbisë.
“Mendoj që marrëveshja do të mund të ishte edhe më e ndërtuar, është një rezultat i lidershipit tonë të dobët, i Kurtit, Osmanit, i ekipës tonë, pse, së pari amerikanët duke ua parë qasjen e tyre si p.sh rastin e targave, nuk e kanë marrë në dorë krejtësisht, drafti është amerikan, Borrell tha sot që ka mbështetjen franceze dhe gjermane, drafti është i shkruar prej amerikanëve, është i gatuar përmes ekipës Borrell-Lajcak por amerikanët e kanë bërë. Ai draft e ka njohjen e ndërsjellë Kosovë-Serbisë, por nuk e ka emrin marrëveshje për njohje, nuk ka marrëdhënie diplomatike”, ka thënë Haradinaj.
Sipas tij, kapitulli dy i këtij drafti, tregon për marrëdhëniet midis dy shteteve të pavarura.
“Çdo obligim i marrur është pjesë e marrëveshjes, edhe obligimet e reja janë pjesë e marrëveshjes”, ka thënë ai.
Ndërsa, sa i përket çështjes së Asociacionit të komunave më shumicë serbe, Haradinaj ka thënë se “ajo që është e rëndësishme të dihet është se nuk i kërkohet Kosovës ndërhyrje në Kushtetutë apo në ligjet e Kosovës, është një detyrë që e ka marrë Kosova por në bazë të Kushtetutës dhe ligjeve të Kosovës”.