Nga aksioni i sotëm i Policisë së Kosovës në veri të vendit, deri më tani janë gjetur mjete të dyshimta eksploduese.
Lajmin për Portalin Dukagjini e ka konfirmuar zëvendësdrejtori i Policisë së Kosovës në Mitrovicën Veriore, Veton Elshani.
“Mjete eksploduese deri tani”, ka thënë shkurt Elshani.
Më herët, Elshani ka thënë se ky aksion lidhet me sulmin terrorist të 24 shtatorit në Banjskë të Zveçanit.
Kujtojmë që të dielën e 24 shtatorit, në fshatin Banjskë të komunës së Zveçanit, Policia e Kosovës u sulmua nga një grup terrorist serb, i cili udhëhiqej nga Millan Radojçiq.
Nga ky sulm mbeti i vrarë rreshteri policor, Afrim Bunjaku, nga Samadrexha e Vushtrrisë, i cili tashmë është shpallur hero. Ndërsa, i plagosur ka mbetur zyrtari policor Alban Rashiti dhe disa të tjerë të lënduar.
Ndërkaq, nga aksioni i Policisë së Kosovës mbetën të vrarë tre pjesëtarë të grupit terrorist serb.