Policia e Kosovës ka kërkuar ndihmë nga qytetarët për kapjen e të dyshuarit për vrasjen e gruas shtatzënë.
Me anë të një kërkese për bashkëpunim, Policia e Kosovës ka publikuar të dhënat personale të të dyshuarit.
Sipas policisë, i dyshuari, Sokol Halili, i lindur më shtatë maj të vitit 1991, nga fshati Godancë i Komunës së Shtimes, kërkohet për vrasjen e rëndë që ka ndodhur të mërkurën e 30 nëntorit, në oborrin e klinikës së Gjinekologjisë, në Prishtinë.
“Njësiti i hetimeve të përgjithshme që operon në kuadër të Drejtorisë Rajonale të Policisë në Prishtinë, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në arrestimin e personit të dyshuar”, thuhet në njoftim.
“Të nderuar, për çdo informatë që mund të çojë në identifikimin e vendndodhjes së personit të dyshuar, kontaktoni policinë në numrin e telefonit: 192”, vijon njoftimi.
Gjykata Themelore në Ferizaj, lidhur me rastin e ndodhur në oborrin e QKUK-së, ku i dyshuari S.H. dyshohet se ka privuar nga jeta tani të ndjerën gruan shtatzënë H.M, ka njoftuar se më tetë shtator të 2022, nga Zyra për Mbrojtje dhe Ndihmë e Viktimave në Ferizaj, është paraqitur kërkesë për lëshimin e urdhrit mbrojtës ndaj palës përgjegjëse S.H.
Sipas njoftimit, thuhet se Gjykata më 13 shtator të po të njëjtit vit, ka lëshuar aktvendimin për urdhër mbrojtje, me të cilën, ka aprovuar kërkesën për urdhër mbrojtje të palës së mbrojtur, kurse palës përgjegjëse i ka shqiptuar masat mbrojtëse sipas nenit 5 dhe 6, të Ligjit për Mbrojtje nga dhuna në familje, në kohëzgjatje prej gjashtë muajsh.
“Ky aktvendim i është dorëzuar palëve dhe atë palës përgjegjëse, mbrojtësit të tij, palës së mbrojtur, mbrojtësit të viktimave, QPS –Lipjan si dhe Stacioni Policor në Lipjan, i cili është urdhëruar që ta bëjë zbatimin e vendimit të urdhrit mbrojtës”, thuhet në njoftim.