Policia e Kosovës, drejtoria rajonale në Gjakovë, ka kërkuar ndihmën e qytetarëve për lokalizimin e Kushtrim Xhakës në lidhje me dy vepra penale, atë të “grabitjes” dhe “mbajtjes në pronësi, kontroll, posedim të paautorizuar të armëve”.
“Personi i dyshuar është: • Kushtrim (Maliq) Xhaka i lindur me 20.08.1984, banues në Prishtinë”, thuhet në njoftimin e policisë.
Sipas policisë, Xhaka veprat penale i ka kryer më 23 shkurt të këtij viti, ndërsa thuhet se po zhvillohen hetime intensive, por prezenca e tij, përkundër angazhimeve hetimore dhe operative, nuk është arritur të sigurohet.
“Lidhur me rastin “Grabitje” dhe “Mbajtja në pronësi, kontroll, posedim të paautorizuar të armëve”, ndodhur me datë 23.02.2024, Sektorit Rajonal i Hetimeve në Drejtorinë Rajonale të Policisë-Gjakovë është duke zhvilluar hetime intensive, me ç’rast është identifikuar edhe një i dyshuar, prezenca e të cilit, edhe përkundër angazhimeve hetimore dhe operative, nuk është arritur të sigurohet”, thuhet në njoftim.
Tutje, në njoftim thuhet se Drejtoria Rajonale e Policisë në Gjakovë, bazuar në autorizimin e Prokurorisë Themelore në Gjakovë, për publikimin e fotografisë të personit të dyshuar në rast, me qëllim lokalizimin e tij, lëshon kërkesë për bashkëpunim me qytetarët dhe se kushdo që ka informacion për vendndodhjen e të dyshuarit të lajmërojë policinë përmes numrave zyrtarë të telefonit apo në stacionin më të afërt.