Një pamje e tillë veç se me më shumë pjesëtarë të Policisë së Kosovës pritet të përsëritet të martën e javës së ardhshme.
Policët nga njësitë speciale, njësisë së hetimeve, rendit publik dhe departamenteve tjera të Policisë do t’i bashkohen thirrjes për protestë njëjtë sikur bëri Njësia Speciale Intervenuese më 1 nëntor.
Kërkesë e tyre ka qenë dhe mbetet rritja e vlerës së shtesës për rrezikshmërinë, pasi e njëjta ishte ulur.
Sipas njohësit të sigurisë, Hysen Gecaj, shtesat për policinë janë të padinjitetshme.
Ai madje krahason pagat e tyre me disa këshilltarë të qeveritarëve.
“Kjo nuk është dinjitoze, po e shohim që Qeveria ia lejon vetës një luks të tepruar me këshilltarë të shumtë efektet e të cilëve nuk i shohim si qytetarë, i shohim pagat marramendëse që i jepen atyre, derisa policët rrezikojnë jetën për neve për çdo ditë”, ka deklaruar njohësi i sigurisë, Hysen Gecaj.
Sipas Gecajt, sidomos rastet e fundit të konfrontimeve të Policisë me keqbërësit do të duhej të ishin alarm për qeverinë e vendit.
“Në veçanti kur kemi të bëjë me rastet si këto të fundit kundërvenja e policëve, grupet e armatosura të cilat plaçkitin argjendari, grupe të cilat si duket kanë edhe premisa të ekstremizmit fetar, atëherë qeveria duhet të kuptoj që shteti është në një pozitë serioze duke i shtu kësaj edhe situatën e Kosovës në veçanti me fqinjët tanë veriorë”, vijon ai.
Përfaqësues të Njësisë Speciale Intervenuese, pas protestës së parë ishin takuar me kryeministrin e Kosovës, takim i cili nuk solli ndonjë konsensus për kërkesat e tyre.