Presidenti i INTERPOL-it ka vizituar Selinë Qendrore të Policisë së Shtetit në Tiranë, për një takim me drejtorin e Përgjithshëm, Muhamet Rrumbullakun.
Siç thuhet në njoftim, diskutimet mes Rrumbullakut dhe Gjeneral Majorit Ahmed Naser Al-Raisi, u fokusuan te forcimi i bashkëpunimit mes Shqipërisë dhe INTERPOL-it në luftën kundër krimit të organizuar.
Drejtori Rrumbullaku e ka falënderuar Al-Raisin për vizitën dhe mbështetjen në organizimin e Konferencës së 51-të Rajonale të INTERPOL-it për Evropën në Tiranë.
Ai ka theksuar rëndësinë e bashkëpunimit të thelluar në shkëmbimin e informacionit dhe operacioneve të përbashkëta për vendosjen para drejtësisë të personave të kërkuar ndërkombëtarisht për krime të rënda.
“Ky bashkëpunim, i konsoliduar në shkëmbim informacioni në kohë shumë të shpejtë dhe operacione të përbashkëta, duhet të shkojë edhe më tej, duke u fokusuar edhe në përpjekjen madhore të Policisë së Shtetit dhe agjencive ligjzbatuese të Shqipërisë për vendosjen para drejtësisë të personave në kërkim ndërkombëtar”, ka deklaruar Rrumbullaku.
Gjeneral Majori Al-Raisi thuhet se e ka vlerësuar suksesin e konferencës dhe angazhimin e Policisë së Shtetit në luftën kundër kriminalitetit, duke shprehur përkushtimin për të intensifikuar bashkëpunimin dhe programet e përbashkëta për luftën kundër kriminalitetit të organizuar në nivel ndërkombëtar.