Presidentja e Republikës së Kosovës, Vjosa Osmani, ka udhëtuar drejt Bullgarisë për një vizitë dy ditore zyrtare me ftesë të homolgut të saj, Rumen Radev.
Zyra e Presidentes ka njoftuar se Osmani pritet të nderohet me nderime të larta ushtarake dhe të zhvillojë takime.
“Përveç takimit teta-a-tetë me presidentin Radev, Presidentja Osmani do ta zhvillojë edhe një takim bilateral dhe më pas do ta kenë një konferencë të përbashkët për media. Delegacioni i kryesuar nga Presidentja Osmani do të marrë pjesë edhe në darkën zyrtare presidenciale të shtruar nga presidenti Radev. Gjatë vizitës në Bullgari, Presidentja Osmani do të takohet, gjithashtu edhe me kryetarin e Parlamentit të Bullgarisë, Vezhdi Romanov”, thuhet në njoftim
Krahas kësaj, Osmanit do t’i dhurohet Çelësi i Sofjes në një ceremoni të veçantë të organizuar nga kryetarja e kryeqytetit bullgar, Yordanka Fandakova.
Në agjendën e vizitës së Presidentes Osmani në Bullgari është edhe ndarja e Medaljes Presidenciale Ushtarake për Forcat e Armatosura të Bullgarisë për kontributin e tyre në kuadër të misionit paqeruajtës të NATO-së (KFOR) në Kosovë.
Kurse në Universitetin “Shën Kliment Ohridski”, Presidentja Osmani do të nderohet me mirënjohje, teksa para stafit akademik, diplomatëve të akredituar dhe studentëve do ta mbajë një diskutim, në të cilin do të flasë për paqen dhe prosperitetin nëpërmjet integrimit euroatlantik në Evropën Juglindore.
Ndërkaq, Osmani do t’ia dhurojë një mirënjohje Departamentit të gjuhëve të përgjithshme, indoevropiane e ballkanike të këtij Universiteti për kontributin e çmuar për studimin, zhvillimin dhe kultivimin e mëtejshëm të gjuhës shqipe.
Vizitës së Presidentes Osmani nuk do t’i mungojë një takim edhe me mërgatën shqiptare që jeton e vepron në këtë shtet.