Prokuroria Speciale ka njoftuar se Martin Berishaj, ambasadori i Kosovës në Kroaci, është intervistuar sot me ftesë të Prokurorisë Speciale, me dyshimet për veprat penale ‘’Shpëlarja e parave’’, ‘’Shmangia nga tatimi’’ dhe ‘’Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’’.
Prokuroria njofton se ambasadori Berishaj edhe më herët është ftuar për intervistim, por vet Berisha kishte kërkuar nga Prokuroria Speciale që të shtyhet intervistimi, për shkak të angazhimit të tij si ambasador.
“Pas interesimit të mediave, Prokuroria Speciale njofton opinionin publik se ambasadori, i Kosovës në Kroaci, Martin Berishaj, është intervistuar sot me ftesë të Prokurorisë Speciale, me dyshimet për veprat penale ‘’Shpëlarja e parave’’, ‘’Shmangia nga tatimi’’ dhe ‘’Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, thuhet në njoftimin e PS.
Avokati i Martin Berishajt, Tomë Gashi, ka thënë se klienti i tij që prej datës 27 janar të vitit 2023 kishte bërë kërkesë që të japë deklaratë sqaruese në Prokurorinë Speciale të Kosovës.
Ai bëri të ditur se tashmë ambasadori Berishaj ka dhënë deklaratë por ajo, sipas tij, është konfidenciale.
Martin Berishaj, ambasadori i Kosovës në Kroaci, sot u intervistua nga Prokuroria e Speciale në Prishtinë.
Ky intervistim vjen pas dyshimeve për një aferë financiare të Berishajt në Slloveni, për të cilën, është raportuar gjerësisht në medie.
Në mediumet sllovene, në prill të vitit të kaluar, ishte raportuar se politikani slloven Robert Golob ka bërë transaksione nga dega serbe e furnizuesit energjetik slloven GEN-i, për te kompania e Berishajt, MB Consulting. E nga kompania e Berishajt janë nxjerrë më pas gradualisht 600 mijë euro para të gatshme që dyshohet se i janë kthyer Golobit.