Çështja e hapjes së Urës së Ibrit është rikthyer në qendër të vëmendjes ndërsa emisari i Bashkimit Evropian për dialogun Kosovë-Serbi, Miroslav Lajçak, dhe komandanti i KFOR-it theksojnë se vendimi për këtë urë duhet të merret brenda kuadrit të dialogut.
Ish-koloneli i Forcës së Sigurisë së Kosovës (FSK), Afrim Veseli, e ka quajtur paradoksale që pas 25 vjetësh ende diskutohet për hapjen e një ure.
Veseli theksoi se ndërkombëtarët, përfshirë NATO-n dhe BE-në, i janë borxhlinj popullit dhe shtetit të Kosovës një shpjegim për moshapjen e Urës së Ibrit, e cila vazhdon të jetë një simbol ndarjeje mes shqiptarëve dhe serbëve lokalë.
“Është paradoksale që 25 vjet pas çlirimit të Kosovës të jetë ende temë një urë. Urat lidhin njerëzit dhe kombet, por në Kosovë kjo urë vazhdon të ndajë dy komunitete”, ka thënë Veseli në “FIVE” të Dukagjinit.
Ndërkohë, zëvendëskryesuesi i Kuvendit Komunal në veri të Mitrovicës, Skënder Sadiku, ka kritikuar ndërkombëtarët për “kreativitet” në ndarjen e qytetit të Mitrovicës.
“Shumë kreativ kanë qenë për të ndarë qytetin, por shumë pak po ka kreativitet në bashkimin e qytetit,” tha Sadiku.
Sadiku gjithashtu kritikoi krijimin e Komunës së Mitrovicës Veriore dhe ndarjen e qytetit me një “park të paqes” dhe lule midis urës, që sipas tij ishin simbole të ndarjes.
“Mos të harrojmë që Komuna Veriore e Mitrovicës është e krijuar dhe e ndarë, në këtë kreativet të ndarjes. Ka qenë trup është krijuar me park dhe me fjalën paqe, kanë bërë park të paqes kanë vendosur lule midis urës. Edh ky ka qenë një kreativitet për me nda dhe me dhënë idenë ndarjes”, ka than Sadiku.