Kryeministri i Kosovës, Albin Kurti, ka bërë të ditur se mbledhja e radhës do të jetë në mes të Qeverisë së Kosovës dhe asaj të Shqipërisë.
Takimi pritet të mbahet më 14 qershor të këtij viti në qytetin e Gjakovës.
14 qershori kremtohet nga gjakovarët si dita e çlirimit të qytetit historik dhe përkujtohet në kalendarin e kësaj treve për të nderuar kujtimin e dëshmorëve që dhanë jetën në luftën për çlirimin e Kosovës.
Ky do të jetë takimi i nëntë mes qeverive shqiptare të të dy shteteve, ndërsa që prej 11 janarit 2014, kur për herë të parë nisi ky bashkëpunim, janë nënshkruar dhjetëra marrëveshje.
Mledhja e fundit në mes dy qeverive ishte mbajtur në qershor të vitit të kaluar, ku kishin arritur pajtueshmëri për 19 pika në sektorë të ndryshëm, në kuadër të mbledhjeve të përbashkëta tradicionale që mbahen ndërmjet dy shteteve.