Ministri i Administrimit të Pushtetit Lokal, Elbert Krasniqi, ka njoftuar se është nënshkruar një marrëveshje me bamirësin Halil Kastratin për bashkëfinancimin e ndërtimit të mbi 200 shtëpive në katër komunat veriore të Kosovës.
Më shumë se 100 shtëpi do të financohen nga Ministria, ndërsa shoqata “Jetimat e Ballkanit” do të mbështesë ndërtimin e mbi 100 shtëpive të tjera.
“Mbi 200 shtëpi të reja në katër komunat veriore të Republikës së Kosovës. Me Halil Kastratin nënshkruajtëm marrëveshjen për bashkëfinancimin e ndërtimit të mbi 200 shtëpive në komunat Leposaviq, Mitrovicë Veriore, Zubin Potok dhe Zveçan. Ministria e Administrimit të Pushtetit Lokal dhe shoqata ‘Jetimat e Ballkanit’, në frymën e bashkëpunimit dhe sigurimit të banimit të qendrueshëm, për banorët e komunave veriore do të ndërtojnë mbi 200 shtëpi duke u dhënë të drejtë familjeve të realizojnë ëndrrën e tyre për të banuar dhe jetuar në tokat e tyre. Mbi 100 shtëpi do të ndërtohen me financim nga Ministria e Administrimit të Pushtetit Lokal dhe mbi 100 nga shoqata ‘Jetimat e Ballkanit’, si fillim për një jetë e re për këto familje”, ka shkruar Krasniqi në Facebook.