Kryeministri i Shqipërisë, Edi Rama, e ka quajtur ngjarje historike Samitin e Bashkimit Evropian e Ballkanit Perëndimor, i cili pritet të mbahet në Tiranë, më 6 dhjetor.
“Me kënaqësinë e vendit mikpritës, për herë të parë të Samitit BE-Ballkani Perëndimor, një ngjarje historike, me respektin për ne që të ardhmen e shohim në familjen e madhe europiane, ju uroj një ditë të mbarë”, ka shkruar Rama në Facebook.
Agjenda e Samitit BE-Ballkani Perëndimor
E marta e 6 dhjetorit do të jetë ditë pushimi në Tiranë.
Vendimi është marrë për shkak se në kryeqytetin e Shqipërisë do të mbahet Samitit i Bashkimit Evropian me Ballkanin Perëndimor.
Po ashtu, në këtë ditë, opozita ka paralajmëruar të mbajë një protestë kundër qeverisë.
Këshilli i Bashkimit Evropian ka zbardhur agjendën e Samitit mes liderëve të BE-së dhe Ballkanit Perëndimor, raporton A2 CNN.
Temat kryesore të diskutimit do të jenë pasojat e agresionit rus kundër Ukrainës, intensifikimi i angazhimit politik, përforcimi i sigurisë dhe ndërtimi i qëndrueshmërisë ndaj ndërhyrjeve të huaja dhe adresimi i sfidave të paraqitura nga migrimi, lufta kundër terrorizmit dhe krimit të organizuar.
Në fund të Samitit, liderët pritet të kenë një deklaratë.
Aktiviteti do të nisë në orën 10:15, me mbërritjen e delegacioneve dhe pritjen zyrtare.
Në orën 11:45 është planifikuar fotoja zyrtare.
Ndërsa në 12:15, programi vijon me seancën plenare dhe drekën e punës, kurse në orën 14:30 me konferencën për shtyp.
E marta e 6 dhjetorit, pritet të zyrtarizohet ditë pushimi për kryeqytetin.
Nga Bulevardi “Dëshmorët e Kombit”, sheshi “Nënë Tereza” dhe përreth stadiumit Arena Kombëtare, do të aplikohen 16 nivele të sigurisë së Policisë shqiptare në bashkëpunim me protokollin e sigurisë së Brukselit.
Godina e Këshillit të Ministrave është parashikuar si plan B për mbajtjen e Samitit, sipas protokollit të kërkuar nga unioni për çdo të papritur.
Ndryshe, kryeministri i Shqipërisë, Edi Rama, për Samitin e Bashkimit Evropian e Ballkanit Perëndimor që pritet të mbahet në Tiranë, më 6 dhjetor, kishte thënë se është një ngjarje historike për historinë e marrëdhënieve ndërkombëtare të Shqipërisë.
Kryeministri i Shqipërisë, Edi Rama, kishte përshëndetur vendimin e presidentit të Këshillit Evropian, Charles Michel, për organizimin e Samitit BE-Ballkani Perëndimor, më 6 dhjetor në Tiranë.
Ndër të tjera, Rama kishte thënë se Tirana nuk është më ajo e disa viteve më parë, por është kryeqyteti i një vendi të respektuar në politikën ndërkombëtare, si dhe një qytet i ri evropian tërheqës për zhvillimin e tij mbresëlënës.
“Nuk besoj se mund ta imagjinonte kush deri disa vite më parë, që tërë liderët e BE-së do të zbrisnin në Tiranë, për një punë që gjithnjë është bërë në Bruksel”, kishte shkruar Rama në Facebook.
Për Ramën, organizimi në Tiranë i një Samiti të liderëve të Bashkimit Evropian dhe Ballkanit Perëndimor është fruti më i bukur i përpjekjes për afirmimin e Shqipërisë, si një zë i respektuar dhe anëtar dinjitoz i bashkësisë ndërkombëtare.
Samiti i BE-së dhe Ballkanit Perëndimor, 6 dhjetori ditë pushimi në Tiranë