Zyra e kryeministrit të Shqipërisë, Edi Rama, ka bërë një reagim në lidhje me ndërhyrjen kirurgjikale që po kryen kreu i qeverisë.
Sipas Zyrës së Kryeministrisë, Rama aktualisht është në sallën e operimit, ndërsa pas përfundimit të ndërhyrjes pritet që ta kalojë natën në Qendrën Spitalore Universitare “Nënë Tereza”.
“Për ndërhyrjen kirurgjikale të Kryeministrit Edi Rama ju bëjmë me dije se: Kryeministri Edi Rama aktualisht po i nënshtrohet një ndërhyrjeje kirurgjikale laparoskopike në Qendrën Spitalore Universitare “Nënë Tereza”. Ekipi mjekësor nën drejtimin e Prof. Dr. Arben Gjata po kryen ndërhyrjen kirurgjikale të hernies inguinale. Pas përfundimit të ndërhyrjes, Kryeministri Rama pritet të kalojë natën e sotme në mjediset spitalore të QSUNT”, njofton kryeministria.
Rama e paralajmëroi këtë ndërhyrje në fund të gushtit, kur teksa ishte për një inspektim në spital.
Siç raporton Top Channel, kjo është hera e dytë brenda 18 muajsh që Rama shtrohet në spital, pasi në prill të vitit të kaluar bëri një ndërhyrje për heqjen e apandesitit.