Kryetari i Komunës së Prishtinës, Përparim Rama, ka deklaruar se granti i Bankës Gjermane për Zhvillim (KfW) për ndërmarrjen “Pastrimi” ka dështuar, pasi sipas tij, Ministria e Financave nuk e ka nënshkruar Marrëveshjen e Financimit.
Rama, përmes një postimi në Facebook, ka fajësuar ministrin në detyrë të Financave, Hekuran Murati, duke thënë se ai nuk e ka nënshkruar marrëveshjen.
Sipas Ramës, partnerët ndërkombëtarë kanë konfirmuar se granti nuk është realizuar për shkak të mosnënshkrimit të marrëveshjes nga Ministria e Financave.
“Është e rëndë dhe e turpshme që para partnerëve tanë ndërkombëtarë duhet të shpjegojmë pse një projekt kaq i rëndësishëm për qytetarët tanë po dështon për shkak të Qeverisë sonë. Por qytetarët nuk mund t’i lëmë të paguajnë çmimin e këtyre bllokadave”, ka shkruar Rama.
Ai ka thënë se Prishtina e ka mbështetjen e Qeverisë gjermane, partnerin dhe projektin, por sipas tij, marrëveshja nuk është nënshkruar nga Murati.
Rama ka njoftuar gjithashtu se Komuna e Prishtinës do të ndërmarrë hapa për zgjidhjen e problemit me mbeturinat, duke krijuar një ndërmarrje komunale të pastrimit.
Sipas tij, vendimi për këtë çështje pritet të merret në seancën e radhës të Kuvendit të Kryeqytetit.