Kryeministri i Shqipërisë, Edi Rama, ka sqaruar se pse është përdorur imazhi i tij në fushatën zgjedhore që po mbahet në Shqipëri më shumë sesa imazhi i kandidatëve për kryebashkiakë.
Sipas Ramës, kandidatët për kryebashkiakë bëjnë fushatë çdo ditë në cepat e bashkive të tyre, por kjo zë pak vend në media në krahasim kur bën fushatë vetë ai.
“Ky është një dimension i këtyre zgjedhjeve që nuk mund të neglizhohet, sepse nuk është thjesht një çështje, do të shkojmë aty, do të zgjedhim një kryetar bashkie dhe patjetër kur vjen puna në nivelin e zgjedhjes së kandidatëve, kandidatët bëjnë fushatë çdo ditë në të gjithë cepat e bashkive të tyre, drejtuesit tanë politikë bëjnë fushatë çdo ditë në të gjithë cepat e bashkive të tyre dhe natyrisht flasin shumë për çështjet e komunitetit, por ato zënë pak vend në media”, ka thënë Rama për “Euronews Albania”.
Rama, gjithashtu, komentoi ecurinë e fushatës dhe premtimin për një fushatë pa shumë shpenzime.
“Fushata është modeste nga pikëpamja e shpenzimeve, shumë më modeste se në të shkuarën. Ishte e ndarë në dy faza, një fazë e parë pa takime të mëdha, takimet kanë qenë të gjitha shumë spontane. Tani është faza e takimeve përmbyllëse që janë takime të mëdha, por përsëri nuk ka tribuna, ekrane, shpenzime të mëdha, kështu që faktikisht, ajo që e bën mbase të duket shumë e madhe si fushatë është prania e njerëzve, nuk ka asgjë të madhe nga pikëpamja e shpenzimeve”, ka theksuar Rama.